काठमाडौं । फ्रान्समा संसदीय निर्वाचनअन्तर्गत हिजो सम्पन्न दोस्रो तथा निर्णायक चरणको मतदानको नतिजा सार्वजनिक भएको छ । दोस्रो विश्वयुद्धयता पहिलोपटक बहुमत ल्याउने चरम दक्षिणपन्थी दलको चाहनामा भने धक्का लागेको छ ।
सार्वजनिक नतिजाअनुसार वामपन्थी दल (एनएफपी) १८२ सिट जितेर ठुलो दल बनेको छ । त्यस्तै राष्ट्रपति इम्यानुएल म्याक्रोंको सत्तारुढ गठबन्धन अनसम्बलले १६८ सिटमा जित हासिल गरेर दोस्रो स्थान कायम गरेको छ ।
मरिन ली पेन र जोर्डन बर्डेलाको चरम दक्षिणपन्थी तथा आप्रवासन विरोधी दल ‘नेसनल र्याली (आरएन)’ ले भने जम्मा १४३ सिट जितेको छ । योसँगै आरएनले पहिलोपटक सरकारको नेतृत्व गर्ने अवसर गुमाएको छ ।
५७७ सदस्यीय फ्रान्सेली संसद्मा कन्जरभेटिभ रिपब्लिकनले ४५ सिट जितेको छ । संसद्मा बहुमतका लागि २८९ सिट चाहिन्छ । कुनै पनि दलले एकल बहुमत नल्याएकाले वामपन्थी दल र राष्ट्रपति म्याक्रोंको गठबन्धनले संयुक्त सरकार बनाउने देखिएको छ ।
आजै वर्तमान प्रधानमन्त्री ग्याब्रियल अटालले राष्ट्रपति म्याक्रोंलाई राजीनामा दिने तयारी थाल्नुभएको छ । राष्ट्रपतिले न्यु पपुलर फ्रन्ट एनएफपीलाई सरकार बनाउन आह्वान गर्ने बताइएको छ ।
गत आइतबार भएको पहिलो चरणको मतदानमा आरएनले एकतिहाइ मत प्राप्त गर्दै ऐतिहासिक जित हासिल गरेको थियो । वामपन्थी गठबन्धन एनएफपी दोस्रो र राष्ट्रपति इम्यानुएल म्याक्रोंको गठबन्धन अनसम्बल तेस्रो स्थानमा रहेका थिए ।
तर, पहिलो चरणमा आरएनले ल्याएको भारी मतबाट त्रसित एनएफपी र अनसम्बलले एक-अर्कालाई सघाउने सहमति गरेकाले दोस्रो चरणमा दक्षिणपन्थी दल आरएन ऐतिहासित जितबाट विमुख भएको हो ।
निर्वाचनमा आश्चर्यजनक रुपमा जित हात पारेपछि वामपन्थी नेता जिन लुक मेलेन्सनले आफ्नो गठबनधनले प्यालेस्टाइनलाई राज्यको मान्यता दिने बताउनुभएको छ । यसअघि चार युरोपेली राष्ट्र स्पेन, नर्वे, आयरल्यान्ड र स्लोभानियाले प्यालेस्टाइनलाई राज्यको मान्यता दिइसकेको छ ।
