काठमाडौं । फ्रान्समा भएको संसदीय निर्वाचनको पहिलो चरणमा मरिन ली पेनको चरम दक्षिणपन्थी दल नेसनल र्याली (आरएन) ले ऐतिहासिक जित हासिल गरेको छ ।
योसँगै आरएनलाई बहुमत पुर्याउनबाट रोक्न दोस्रो चरणको चुनावमा वामपन्थी गठबन्धन न्यु पपुलर फ्रन्ट र राष्ट्रपति इम्यानुएल म्याक्रोंको दलबीच एक-अर्काका उम्मेदवारलाई सघाउने सहमति भएको छ । पहिलो चरणमा भएको चुनावमा ६६.७ प्रतिशत मतदान भएको थियो ।
यस क्रममा आरएन र यसको गठबन्धन ३३.१५ प्रतिशत मत ल्याउँदै पहिलो भएको छ । वामपन्थी गठबन्धन न्यु पपुलर फ्रन्ट एनएफपी २७.९९ प्रतिशत मत प्राप्त गर्दै दोस्रो स्थानमा छ । राष्ट्रपति इम्यानुएल म्याक्रोंको अनसम्बल गठबन्धन २०.७६ प्रतिशत मत प्राप्त गर्दै तेस्रो स्थानमा खुम्चिएको छ ।
युरोपेली संसद्का लागि गत महिना भएको निर्वाचनमा आरएन पार्टीले अत्यधिक स्थानमा जितेपछि हतार-हतार र आश्चर्यजनक रुपमा निर्धारित समयभन्दा तीन वर्षअगावै संसद् विघटन गरी निर्वाचन आह्वान गरेका राष्ट्रपति इम्यानुएल म्याक्रोंका लागि यो परिणाम घातकसिद्ध भएको छ ।