पाल्पा । पाल्पाको निस्दी गाउँपालिका-५ गल्धामा उत्पादन भएको ३६ हजार ३३० केजी सेतो सिमी यसवर्ष युरोप निर्यात भएको छ ।
अर्गानिक प्रमाणित भएपछि गल्धाको ढुंगानाबेंसीस्थित गल्धा सामाजिक उद्यमी महिला सहकारी संस्थामार्फत गतवर्षदेखि सेतो सिमी युरोप निर्यात हुँदै आएको छ । नेदरल्यान्ड्सबाट ४० हजार किलोको माग आएकोमा ३६ हजार ३३० केजी पठाउन सफल भएको गल्धा सामाजिक उद्यमी महिला सहकारीकी अध्यक्ष अममाया थापाले बताउनुभयो ।
जसबाट किसानले करिब ८० लाख रूपैयाँ आर्जन गर्न सफल भएका छन् । सहकारीले गतवर्ष पनि झन्डै २० हजार किलो सेतो सिमी युरोपमै पठाएको थियो ।
