दोलखा । स्वदेशी लगानीमा दोलखामा निर्माणाधीन दुई वटा जलविद्युत आयोजनाको निमार्णको काम तीन महिनादेखि बन्द भएको छ ।
सरकारकै ढिलासुस्तीका कारण तामाकोसी पाँचौं र माथिल्लो तामाकोसी आयोजनाको २० मेगावाटको रोल्वालिङ काम बन्द भएको हो । जनताको जलविद्युत कार्यक्रम अनुसार निर्माणाधीन तामाकोसी पाँचौ आयोजनाको काम बन क्षेत्रको विवादका कारण बन मन्त्रालयले बन्द गराएको हो ।
निकुञ्ज,संरक्षण क्षेत्रमा पुर्वाधार तथा विकासका संरचना बनाउन भएको कानुन संसोधन सर्वोच्च अदालतले खारेज गरिदिएको थियो । जस्का कारण निकुञ्ज र संरक्षण क्षेत्रमा निर्माणाधीन आयोजनाको काम रोकिएका थियो । उक्त फैसलाविरूद्धको रिटमा वन मन्त्रालयलाई कानुन बनाएर आयोजनाको कामअघि बढाउन भने पनि पूर्ण पाठ नआएको भन्दै असार २० गतेबाट ९९ दशमलब ८ मेघावटको तामाकोसी पाँचौं र माथिल्लो तामाकोसी आयोजनाको २० मेगावाटको रोल्वालिङ काम बन्द भएको हो ।
तामाकोसी पाँचौं आयोजनाको अडिट १ र विद्युत गृहको काम भैरहे पनि मुख्य २,३ र ४ नं. अडिट टनेलको काम पूर्ण रूपमा बन्द छ । जस्का कारण लामो समयदेखि काम बन्द भएपछि निर्माण कम्पनी सिनो हाईड्रोले त्यअवधिकको क्षतिपूर्ति दाबी गर्ने आयोजनाका एक अधिकारीले बताए ।
निमार्णमा अवरोध भएको उर्जा मन्त्रालयलाई जानकारी पटक-पटक गराइसकेको तामाकोसी पाँचौका कार्यकारी प्रमुख बिनोद भण्डारीले बताउनुभयो । निर्माणाधीन आयोजनाका लागि कानुन तयार भएर उर्जा हुँदै कानुन मन्त्रालय पुगिसकेकाले तिहारपछि आयोजना अवरोध हटेर कामले गति लिने उहाँले बताउनुभयो ।
आयोजनाको काममा सरकारी अवरोध हुँदा ४ वर्षमा निर्माण सकिने भनेपनि केहि समय लम्बिने देखिएको छ । २१ अर्ब लाग्ने अनुमान गरिएको आयोजनाको लागत बढने एक अधिकारीले बताए ।
