काठमाडौं । सरकारले चालु आर्थिक वर्षको पहिलो तीन महिनामा साढे २ खर्ब राजस्व संकलन गरेको छ ।
अर्थ मन्त्रालयका अनुसार साउन, भदौ र असोजमा २ खर्ब ५१ अर्ब १८ करोड रूपैयाँ राजस्व प्राप्ति भएको छ । यो लक्ष्यको ७८.१२ प्रतिशत हो । असोज मसान्तसम्म सरकारले ३ खर्ब २१ अर्ब ५३ करोडको लक्ष्य लिएको थियो ।
असोज महिनामा १ खर्ब ३ अर्ब ७ करोड उठाउने लक्ष्य रहेकोमा प्राप्ति ९२ अर्ब ४७ करोड रहेको छ । यो लक्ष्यको ८९.७१ प्रतिशत हो । गत वर्षको असोज महिनामा ८३ अर्ब ५० करोड संकलन भएको थियो । कर चुहावट रोक्न राजस्व प्रशासन सक्रिय रहेकाले अपेक्षा अनुसार नै राजस्व संकलन भएको अर्थ मन्त्रालयको भनाइ छ ।
गत आर्थिक वर्षको पहिलो तीन महिनामा सरकारले २ खर्ब ४६ अर्ब १ करोड रूपैयाँ संकलन गरेको थियो । गत वर्षको त्रैमासिक लक्ष्य ३ खर्ब ९ अर्ब रहेको थियो । चालु आर्थिक वर्षमा सरकारको वाषिर्क राजस्व लक्ष्य भने १४ खर्ब ८० अर्ब रूपैयाँ रहेको छ । यस वर्ष जेन-जी आन्दोलनका बीच राजस्व संकलन उल्लेख्य रहेको मन्त्रालयका अधिकारीहरूले जनाएका छन् ।
