काठमाडौं । सरकारले दिँदै आएको अनुदानलाई निरन्तरता दिन माग गर्दै आन्दोलनरत उखु किसानले राजमार्ग केन्द्रित आन्दोलन गर्ने निर्णय गरेका छन् ।
सरकारले आफूहरूका मागमा बेवास्ता गरेको भन्दै उनीहरूले अब राष्ट्रिय राजमार्गहरू अवरूद्ध गर्ने चेतावनी दिएका हुन् । उखु उत्पादक महासंघ नेपाल र उखु उत्पादन हुने जिल्लाहरूका संघको शनिबार बसेको संयुक्त बैठकले यही भदौ २५ गतेदेखि राजमार्ग अवरूद्ध पारेर आन्दोलन गर्ने निर्णय गरेको हो ।
महासंघले उखु किसानलाई उपलब्ध गराउन बाँकी अनुदान रकम विनासर्त भुक्तानी गर्नुपर्ने, उखुको मूल्य तोक्दा किसान प्रतिनिधिहरूको सहभागिता सुनिश्चित गर्नुपर्ने र किसानलाई सडकबाट घर खेतमा फर्कने वातावरण बनाउन माग गरेको छ ।
उखु किसानहरूले भदौ ८ गतेदेखि काठमाडौंको माइतीघरमा धर्ना र विरोध प्रदर्शन गर्दै आएका छन् । यो बीचमा सरकारका कृषिमन्त्रीसहितको सरकारी वार्ता टोलीसँग तीन पटक वार्ता भए पनि कुनै निष्कर्ष निस्किएको थिएन ।
उखु किसानहरूले अनुदान रकम भुक्तानीका लागि कृषि मन्त्रालयले २ अर्ब रूपैयाँ बजेटमा समावेश गरी सकेको थियो । तर किसानले पाउनुपर्ने अनुदान रकमलाई गैरजिम्मेवार ढंगबाट कटौती गरिनु निन्दनीय भएको निष्कर्ष पनि किसानले निकालेका छन् ।
