धनकुटा । धनकुटाको सिंधुवा, जोरपाटी, परेवादिन, मूर्तिढुंगालगायतका क्षेत्रमा यतिबेला बन्दा बिक्रीको मुख्य सिजन चलिरहेको छ । गत वर्षभन्दा उत्पादनमा सुधार भए पनि किसानले बन्दाको उचित मूल्य पाएको छैनन् ।
प्रतिकेजी ४ देखि ११ रूपैयाँमा बन्दा बेचिरहनुपर्दा उत्पादन लागत नै नउठ्ने चिन्ताले किसानलाई सताएको छ । ताजा तरकारी उत्पादनका लागि प्रसिद्ध धनकुटाको छथरजोरपाटी क्षेत्रका किसान बन्दाले भाउ नपाएपछि निरास बनेका छन् ।
निर्यातको मुख्य सिजन चलिरहेका बेला लागत नै नउठ्ने मूल्यमा बन्दा बेच्नु परेको उनीहरू सुनाउँछन् । जोरपाटी क्षेत्रका किसान अहिले ४ देखि अधिकतम प्रतिकिलो ११ रुपैयाँमा आफ्नो उत्पादन बेच्न बाध्य छन् ।
मल, बीउ, बिषादी, खनजोत, गोडमेल र खेतालाको ज्याला जोड्दा एक किलो बन्दा उत्पादन गर्न किसानलाई करिब १० रूपैयाँ लागत पर्छ । तर उत्पादनले भाउ नपाउँने बिगत देखिको समस्या अहिले पनि उस्तै छ । छथर जोरपाटी गाउँपालिकाले तरकारी उत्पादनमा किसानलाई सघाउँदै आएपनि बजारीकरण र निर्यातका क्षेत्रमा काम गर्न सकेको छैन् ।
धनकुटामा एक हजार ४ सय ९८ हेक्टर क्षेत्रफलमा भइरहेको खेतिबाट बार्षिक २ करोड ८० लाख किलो बन्दाकोपी उत्पादन हुन्छ । बन्दाकोपी बिक्रीबाट धनकुटामा बार्षिक ३० करोड रूपैयाँ भित्रने कृषि ज्ञान केन्द्र धनकुटाले जनाएको छ ।
