काठमाडौं । स्वदेशी लगानीको देशकै ठूलो माथिल्लो तामाकोशी जलविद्युत केन्द्रले शनिबार बिहानदेखि विद्युत उत्पादन बन्द गरेर जलाशय सफा गर्ने भएको छ ।
४ सय ५६ मेगावाट क्षमताको तामाकोशी जलविद्युत केन्द्रले शनिबार बिहान ५ बजेदेखि राति ८ बजेसम्म जलाशय पानी खाली गराउने भएको हो । यसले १५ घण्टासम्म तामाकोशीको विद्युत उत्पादन बन्द हुने आयोजनाका विद्युत केन्द्रले जनाएको छ ।
जलशय सफागर्ने क्रममा तामाकोशी नदीको बहाव बढ्ने घट्ने भएकाले तटीय क्षेत्रका बासिन्दालाई सर्तकता अपनाउन पनि केन्द्रले सूचना जारी गरेको छ । यसैगरी तामाकोशीमा माछा मार्न, बालुवा चाल्ने लगायतका काम नगर्न र नदीको छेउछाउ नजान विद्युत केन्द्रले आग्रह गरेको छ ।
वर्षायाममा बाढीले बगाएर ल्याएका गेग्रानले जलाशय भरिएपछि सफा गर्न लागिएको हो । यस्तै आयोजनाले बालुवा थिग्र्याउने पोखरी टनेल, र विद्युतगृहको समेत सरसफाइ र मर्मत गर्नेछ ।
वर्षमा दुई पटक जलाशय सफा गर्ने गरिएको छ। यो नियमित प्रक्रिया भएकाले जलाशय सफा गर्ने क्रममा १५ घण्टा राष्ट्रिय प्रशारण लाइनमा तामाकोशीको ४ सय ५६ मेगावाट बिजुली उपलब्ध हुने छैन ।
