काठमाडौं । नेपाल राष्ट्र बैंकले ५० रुपैयाँ दरका ४२ करोड नोट छपाइ आपूर्तिका लागि बोलपत्र आह्वान गरेको छ ।
बैंकले आज सार्वजनिक सूचना प्रकाशन गर्दै सुरक्षित तवरले नोट छाप्नका लागि अन्तर्राष्ट्रियस्तरको बोलपत्र आह्वान गरेको हो ।
राष्ट्र बैंकले जारी गरेको सूचनाअनुसार बोलपत्रको मूल्य नेपाली रुपैयाँमा २० हजार रहेको छ भने अन्य विदेशी मुद्राहरूमा यूएस डलर १४६, यूरो १२६ र पाउण्ड १०९ निर्धारण गरिएको छ ।
बोलपत्र कम्तीमा १२० दिनसम्म मान्य रहनेछ र न्युनतम ४ करोड रुपैयाँको बैंक जमानतपत्र पनि संलग्न गर्नुपर्ने उल्लेख छ ।
राष्ट्र बैंकको मुद्रा व्यवस्थापन विभागले नोट छपाइका लागि आवश्यक बजेटसमेत विनियोजन गरिसकेको जनाएको छ ।
बोलपत्र बुझाउने अन्तिममिति २०८२ भदौ २३ गतेलाई तोकिएको छ ।
