बाँके । संस्कृति, पर्यटन तथा नागरिक उड्डयनमन्त्री बद्रीप्रसाद पाण्डेले विदेशी आगन्तुकलाई नेपाली आकाश सुरक्षित रहेको विश्वास दिलाउनसके पर्यटन विकासमा सघाउ पुग्ने बताउनुभएको छ ।
नेपालगन्जमा आज (शुक्रबार) होटेल व्यवसायी संघ लुम्बिनी प्रदेशको दोस्रो अधिवेशन उद्घाटन गर्दै मन्त्री पाण्डेले देशको आर्थिक अवस्थामा सुधार ल्याउन हवाईसँगै सडक यातायातसमेत भरपर्दो तुल्याउन सक्नुपर्ने आवश्यकता देखिएको बताउनुभयो ।
यसका लागि विद्यमान पर्यटन नीति र ऐन बाधक देखिएको हुँदा संशोधनका लागि गठित कार्यदलले अबको तीन महिनाभित्रै पर्यटन तथा होटेल व्यवसायलाई दिशाबोध गराउने गरी प्रतिवेदन बुझाउने जानकारी उहाँले दिनुभयो ।
अधिवेशनमा होटेल व्यवसायीहरूले नारायणी नदीदेखि पश्चिम महाकालीसम्मको आर्थिक विकासका लागि योगदान दिनसक्ने भैरहवाको अन्तर्राष्ट्रिय विमानस्थल तत्काल सञ्चालनमा ल्याउन माग गरेका छन् ।