काठमाडौं । नेपाल नागरिक उड्डयन प्राधिकरणका महानिर्देशक प्रदीप अधिकारीले गौतमबुद्ध अन्तर्राष्ट्रिय विमानस्थल सञ्चालनका लागि निजी क्षेत्रको सक्रियता आवश्यक रहेको बताउनुभएको छ ।
राष्ट्रियसभाको सार्वजनिक नीति तथा प्रत्यायोजित विधायन समितिको बैठकमा बोल्दै महानिर्देशक अधिकारीले अहिले नै विमानस्थल चलेन भनेर आत्तिनुपर्ने अवस्था नभएको जनाउनु भयो । उहाँले गौतमबुद्ध अन्तर्राष्ट्रिय विमानस्थलमा आवश्यक सबै सरकारी निकायहरुका शाखा बिस्तार भइसकेको पनि जनाउनु भयो ।
अधिकारीले भन्नु भयो, 'अन्तर्राष्ट्रिय उडानका लागि आवश्यक सरकारी सबै कार्यालयहरु श्रम, भिसा, बैंकहरुसमेत पुगेको छ । तर निजी क्षेत्रले चासो नदिँदा विमानस्थल चल्न कठिन भइरहेको छ ।' महानिर्देशक अधिकारीले विमानस्थल सञ्चालनका लागि सरकारी निकायहरुको काम भन्दा ठूलो क्षेत्र निजी क्षेत्र रहेको र वैदेशिक उडानका लागि म्यानपावर, तालिम केन्द्र, भाषा कक्षाहरु, बीमा, होटल लगायत निजी क्षेत्रले व्यवस्थापन गर्न आवश्यक रहेको उल्लेख गर्नुभयो ।
नागरिक उड्डयन प्राधिकरणलाई ऐनले दिएको जिम्मेवारी मर्मत, सञ्चालन र अप्रेसनका कुराहरु सबै पूरा भएको उहाँको भनाइ छ । नेपाली जहाजकै संख्या कम भएकाले पनि विमानस्थल सञ्चालनमा कठिनाइ भएको उहाँको भनाइ छ । 'विमानस्थलहरु सञ्चालनका लागि निजी क्षेत्रको लगानी आवश्यक छ । जहाजहरु थप्नुपर्ने अवस्था छ । निजी क्षेत्रले जहाज थप्नका लागि सरकारको नीति हेर्नुपर्ने हुनसक्छ ।' उहाँले सरकारले जहाज खरिद गर्नेहरुलाई छुट दिन आवश्यक रहेको बताउनु भयो ।
महानिर्देशक अधिकारीले सरकारले श्रमका उडानहरु सबै भैरहवाबाट गर्ने निर्णय गर्नसके पनि विमानस्थल चल्ने बताउनु भयो । त्रिभुवन अन्तर्राष्ट्रिय विमानस्थलको ग्रोथ ९० लाख पुग्न थालेकाले आगामी एक वर्षदेखि धान्नसक्ने अवस्था नहुने जनाउँदै त्यसपछि गौतमबुद्ध अन्तर्राष्ट्रिय विमानस्थल थप चलायमान हुने जनाउनु भयो । अधिकारीले भन्नु भयो, 'त्रिभुवन अन्तर्राष्ट्रिय विमानस्थल स्तरोन्तिका लागि आगामी कात्तिक २३ गतेदेखि चैत १८ गतेसम्म करिब पाँच महिना बेलुका १० बजेदेखि ८ बजेसम्म बन्द हुँदैछ । त्यो बेला विकल्प विमानस्थल गौतमबुद्ध बन्न सक्छ ।'