एनपीएलमा शनिवार साविक विजेता जनकपुर र उपविजेता सुदूरपश्चिम भिड्दै

काठमाडौं । एनपीएलको आजको दोस्रो खेलमा साविक विजेता र उपविजेता टोलीबीचमा हेभिवेट भिडन्त हुँदैछ। तर यो सिजनमा डिफेन्डिङ च्याम्पियन खराब लयबाट गुज्रिरहेको छ। लगातार तेस्रो हारको सामना गरेको जनकपुरलाई आज लय फर्काउने अवसर त छ, तर सुदूरपश्चिमविरुद्ध जितलाई आत्मसाथ गर्न निकै चुनौतीपूर्ण देखिन्छ ।

अहिलेको अंकतालिका हेर्दा यो खेल शीर्षस्थान र तालिकाको पुछारमा रहेको टिमबीचको हो। तर एनपीएलमा सबैभन्दा धेरै समर्थक भएका टोली पनि यी नै हुन्। त्यसैले यो खेल मैदानमा मात्रै सीमित छैन मैदान बाहिरका दर्शकले निकै प्रतीक्षा गरेको खेल हो। लिगमा सुदूरपश्चिम अहिलेसम्म अपराजित छ ।

उसले पहिलो खेलमा काठमान्डू गोर्खाजलाई हराएको थियो भने दोस्रो खेलमा पोखराविरुद्ध १८ रनको जित हाासिल गरेको थियो। आफ्नो लय कायम राख्न सफल रोयल्सले कर्णाली याक्सलाई ४५ रनले हराएको थियो। पछिल्लो खेलमा लुम्बिनीविरुद्ध सहज जित हात पारेपछि सुदूरपश्चिम अहिले कडा फाइट दिनसक्ने टोलीको पर्खाइमा देखिन्छ। ब्याटिङ, बलिङ र फिल्डिङ तीनै क्षेत्रमा राम्रो विशेषता भएका खेलाडीको उपस्थितिले सुदूरपश्चिम कमजोर अवस्थाबाट पनि कमब्याक गर्नसक्ने टोलीका रूपमा परिचित छ ।