काठमाडौं । एएफसी अन्डर-१७ महिला एसियन कप २०२६ को छनोटअन्तर्गत नेपाल समूह 'एफ' मा परेको छ । मलेसियाको क्वालालम्पुरस्थित एएफसी मुख्यालयमा आयोजित ड्रमा नेपालसहित आयोजक थाइल्यान्ड र तुर्कमेनिस्तान यस समूहमा परेका छन् ।
छनोट प्रतियोगितामा सहभागि हुाने कुल २७ राष्ट्रलाई ८ समूहमा विभाजन गरिएको छ । जसमा तीन समूहमा ४ टोली र पाँच समूहमा ३ टोली रहने छन् ।
छनोट चरण अक्टोबर १३ देखि १७ सम्म सिंगल राउन्ड रोबिन प्रणालीमा आयोजना हुनेछ । हरेक समूह विजेता ८ टोलीले फाइनल चरणमा स्थान बनाउनेछन् । मुख्य चरणमा कुल १२ टोली प्रतिस्पर्धा गर्नेछन् ।
अन्डर-१७ महिला एसियन कपमा छनोट चरणका समूह विजेता ८ टोलीसँगै आयोजक चीन, जापान, दक्षिण कोरिया र उत्तर कोरिया सहभागी हुनेछन् । यी चार टोली भने यसअघि नै स्वतः छनोट भइसकेका छन् । अन्डर-१७ महिला एसियन कप सन् २०२६ को अप्रिल ३० देखि मे १७ सम्म चीनमा हुने छ।
