काठमाडौं । फिफा वरियतामा नेपाली राष्ट्रिय महिला फुटबल टिमले १३ स्थान सुधार गरेको छ । अघिल्लो पटक एक सयौं स्थानमा रहेको नेपाल ८७औं स्थानमा उक्लिएको छ ।
यो नेपाली महिला टिमले हालसम्म प्राप्त गरेको उच्च वरियता हो । यसअघि नेपाल सर्वाधिक ९१औं स्थानमा पुगेको रेकर्ड थियो । साथै यस पटक नेपालले सुधार गरेको १३ स्थानसमेत हालसम्मकै ठूलो छलाङ हो । यसअघि नेपालले एकैपटक अधिकतम् १० स्थान सुधार गरेको थियो । एसियाली राष्ट्रहरूमध्ये नेपाल १६औं स्थानमा छ ।
दक्षिण एसियाली टोलीहरूमा दोस्रो स्थानमा छ । सात स्थान सुधार गर्दै ६३औं स्थानमा पुगेको भारत दक्षिण एसियाको शीर्ष स्थानमा छ । २४ स्थान सुधार गर्दै १ सय ४ औं स्थानमा पुगेको बंगलादेश साफ राष्ट्रमध्ये तेस्रो स्थानमा छ ।
नेपालले महिला एसियन कप छनोटमा श्रीलंका र लाओसलाई हराउँदा उज्बेकिस्तानसँग बराबरी खेलेको थियो । एसियन कपमा छनोट हुन नसके पनि यस प्रतियोगितापछि नेपालको वरियतामा ठूलो सुधार आएको हो ।
स्पेन वरियताको शीर्ष स्थानमा उक्लिएको छ भने अमेरिकी टोली दोस्रोमा झरेको छ । तीन स्थान सुधार गर्दै स्वीडेन तेस्रो स्थानमा पुगेको छ ।
