काठमाडौं । नेपालकी सिभाली गुरुङ बेल्जियममा भएको यङ च्याम्पियन्स कपको गर्ल्स सिंगलतर्फ क्वाटरफाइनल प्रवेश गरेकी छिन् ।
सिभालीले अन्तिम १६ को प्रतिस्पर्धामा टर्कीयाकी समाली इदिललाई तीन सेटमा पराजित गरेकी हुन् । सिभाली एक सेटले पछि परेको स्थितीबाट खेलमा फर्किएकी थिइन् । उनले पहिलो सेट ४-६ ले गुमाइन् । तर बाँकी दुई सेटमा उत्कृष्ट पुनरागमन गर्दै उनले अन्तिम आठमा स्थान सुरक्षित गरेकी हुन् । सिभालीले दोस्रो सेट ६-३ ले आफ्नो पक्षमा पारेकी थिइन् ।
तेस्रो सेटमा उनले इदिललाई ६-४ ले पराजित गरिन् । सिभाली डबल्सतर्फ पनि सेमीफाइनल पुगेकी छिन् । उनी भारती खेलाडीको साथ डबल्समा प्रतिस्पर्धा गर्दैछिन् । सिभाली हाल जुनियर टेनिस युरोप टुरमा छिन् । यसअघि उनले फ्रान्समा डबल्समा स्वर्ण जितेकी थिइन् । ताइपेइ खेलाडीको साथमा डबल्समा प्रतिस्पर्धा गरेकी उनको जोडीले ब्राजिललाई हराएको थियो । जर्मनीमा भने सिभालीको जोडी दोस्रो भएको हो ।
फाइनलमा सिभाली र ताइपेइ खेलाडी क्यानडासंग पराजित भएका थिए । सिभालीको बेल्जियम युरोप टुरको अन्तिम गन्तब्य हो । उनी अर्को साता नेपाल फर्कने छिन् ।