काठमाडौं । इङ्लिस प्रिमिर लिग टोली आर्सनलले युएफा च्याम्पियन्स लिगको अन्तिम १६ मा आफ्नो स्थान सुरक्षित गरेको छ । घरेलु मैदान एमिरेट्स स्टेडियममा क्रोसियन टोली डायनामो जाग्रेबमाथि ३-० को सहज जित हासिल गरेपछि मिकेल आर्टेटाको टोली आर्सनलले अन्तिम १६ मा स्थान सुरक्षित गरेको हो ।
आर्सनलको जितमा डेक्लान राइस, काई हाभट्र्ज र मार्टिन ओडेगार्डले समान १-१ गोल गरे ।
खेल सुरू भएको दुई मिनेटभित्र हाभट्र्जले गेब्रियल मार्टिनेलीको क्रसमा गोल गर्दै आर्सनललाई सुरूआती अग्रता दिलाएका थिए । पहिलो हाफमा गेब्रियल म्यागाल्हेस र हाभट्र्जले सहज अवसरमा पनि गोल गर्न नसक्दा आर्सनल अग्रता विस्तार गर्नबाट चुक्यो । तर ६६ औं मिनेटमा हाभट्र्जले इङ्लिस टोलीका लागि दोस्रो गोल थपे । स्टपेज समयमा ओडेगार्डले लिआन्ड्रो ट्रोसार्डको डिफ्लेक्टेड क्रसलाई गोलमा परिणत गरेपछि आर्सनलले ३-० को सहज जित हात पारेको छ।
जारी सिजन आर्सनल घरेलु मैदानमा अपराजित छ । यस जितले आर्सनल तालिकाको तेस्रो स्थानमा उक्लिएको छ । उसले ७ मध्ये ५ खेल जित्दै १६ अंक जोडेको छ । समान खेलमा २ जित सहित ८ अंक जोडेको डायनामो जाग्रेब २६ औं स्थानमा छ ।
