काठमाडौं । आर्सनलले, इङलिस प्रिमियर लिगमा इप्सिच टाउनमाथि १-० गोलको जित हात पारेको छ । यो नतिजापछि आर्सनल, तालिकाको दोस्रो स्थानमा उक्लिएको छ ।
इमिरेट्स स्टेडियममा गएराति भएको खेलमा घरेलु टोलीले २३ औं मिनेटमा अग्रता लियो । काइ हाभर्टसले , लियान्द्रो ट्रोसार्डको क्रसमा गोल गर्दै आर्सनललाइ १-० ले अघि बढाए । मिकेल अर्टेटाको टिमले ८३ दशमवल पाँच प्रतिशत बल पोसेसन राख्दै सुरुवातमा दबाबमा बनायो । तर थप गोल गर्न भने सकेन ।
डेक्लान राइसले गोलका लागि गरेको प्रयास सफल भएन । गाब्रिएल जेजसले पनि गोल गर्ने मौका गुमाए । दोस्रो हाफमा पाहुना टिम इप्सिचले आर्सनललाई चुनौती दिने कोसिस गर्यो । ब्राजिलियन गाब्रएलले खेललाई थप सहज बनाउने अवसर पाए पनि उनको हेडरले पोस्टको दिशा लिन सकेन ।
हाभर्टसलाई पनि व्यक्तिगत दोस्रो गोल गर्ने अवसर प्राप्त भएको थियो । ट्रोसार्डको हेडरलाई उनले कनेक्ट गर्न सकेनन । जीतपछि आर्सनलले, लिग लिडर लिभरपुलसँगको दूरी ६ अंकमा झारेको छ । आर्सनलको १८ खेलबाट ३६ अंक छ । शीर्ष स्थानको लिभरपुलको ४२ अंक छ । तर लिभरपुलसँग एक खेल हातमा छ । आर्सनल घरेलु मैदानमा अपराजित रहदै वर्ष टुंग्याउने एक्लो प्रिमियर लिग क्लब हो ।
