काठमाडौं । काठमाडौं विश्वविद्यालयले नेपाली राष्ट्रिय महिला टोलीकी गोलकिपर अञ्जना राना मगरलाई सम्मान गरेको छ । रोटर्याक्ट क्लब अफ काठमाडौं युनिभर्सिटी, धुलिखेल र काठमाडौं युनिभर्सिटी फुटबल क्लबले संयुक्त रूपमा आयोजना गरेको कार्यक्रममा उहाँलाई प्रशंसापत्र सहित सम्मान गरिएको हो ।
विद्यार्थीहरूलाई प्रेरित गर्न, खेल संस्कृतिको प्रवर्द्धन गर्न, महिला सशक्तीकरण र खेलाडीहरूको सम्मान गर्न कार्यक्रम आयोजना गरिएको रोटर्याक्ट क्लब अफ काठमाडौं युनिभर्सिटीकी प्रेसिडेन्ट रविना श्रेष्ठले बताउनु भयो । विद्यार्थीहरूले अञ्जनासँग एक घण्टा लामो अन्तरक्रिया तथा प्रश्नोत्तर समेत गरेका थिए ।
क्लबले ‘चिया गफ’ नाम दिएर विभिन्न विधामा सफलता हासिल गरेका व्यक्तित्वहरूसँग अन्तरक्रियात्मक छलफलहरू आयोजना गर्दै आएको छ । सोही अनुरूप यस कार्यक्रम गरिएको बताइएको छ ।
गोलकिपर अञ्जनाले विद्यार्थीहरूसामु आफ्नो खेलकुद यात्राबारे जानकारी दिनुका साथै विद्यार्थीका प्रश्नको जवाफ दिनु भएको थियो ।
