काठमाडौं । नेपाल प्रिमियर लिग (एनपीएल)मा पोखरा एभेन्जर्स विरुद्ध काठमान्डु गुर्खाजले शानदार जित हात पारेको छ ।
टस हारेर पहिले ब्याटिङ गरेको पोखराले निर्धारित २० ओभरमा ८ विकेटको क्षतिमा १३८ रन बनाएको थियो । जवाफी ब्याटिङमा उत्रिएको काठमान्डुले १४ ओभर एक बलमा चार विकेटको क्षतिमा १४२ रन बनाउँदै ३५ बल बाँकी छँदै लक्ष्य पूरा गर्यो । काठमान्डुले पोखरामाथि ६ विकेटको जित हात पार्यो ।
प्लेअफको सम्भावना कायमै राख्न दुवै टिमले यो खेल जित्न आवश्यक थियो । काठमान्डुले खेल जित्दै आफ्नो प्लेअफको सम्भावना जीवितै राखेको छ । यो हारले पोखरालाई भने संकटमा पारेको छ ।
आजको खेलमा पोखराका लागि रेमन रिफरले सर्वाधिक ४१ रन बनाए । दिनेश खरेलले ३८ तथा दिलिप नाथले २७ रन बनाए । अन्य ब्याटरले उल्लेख्य रन बनाएनन् ।
बलिङतर्फ काठमान्डुका करण केसी र रसीद खानले तीनतीन विकेट लिए । जेरार्ड एरास्मस र माइकल लेभिटले एकएक विकेट लिए ।
काठमान्डुको जितमा स्टिफन इस्किनाजीले सर्वाधिक ६० रन बनाए । माइकल लेभिटले ३२, जेरार्ड एरास्मसले २५ तथा भीम सार्कीले २२ रन बनाए । पोखराका विपीन खत्रीले तीन तथा माइकल लिस्कले एक विकेट लिए ।
