काठमाडौं । प्रिमियर लिगमा आर्सनलले नटिङगम फरेस्टलाई तीन-शून्य गोलले पराजित गरेको छ । जितसँगै उपाधि दौडमा रहेको आर्सनल ट्रयाकमा फर्कियो ।
इमिरेट्स स्टेडियममा आर्सनलका लागि १३ औं मिनेटमा बुकायो साकाले गोलको खाता खोलेका थिए । पहिलो हाफमा यही अग्रतामा घरेलु टोली कायम रह्यो । जारी सिजन सरप्राइज प्याकेजका रुपमा रहेको नटिङगमले, यो खेलमा भने रिदम समाउन सकेन ।
यो खेल अघिसम्म दुवै टिमको समान २२ अंक थियो । ५२औं मिनेटमा थोमस पार्टीले आर्सनलको अग्रता दोब्बर बनाए । ८६औं मिनेटमा इदन नेवानेरीको गोलसँगै आर्सनलले तीन-शून्यको सहज जितका साथ खेल टुंग्यायो । आर्सनलको प्रिमियर लिगका पछिल्ला पाँच खेलमा यो पहिलो जित हो ।
जितसँगै आर्सनल प्रशिक्षकका रुपमा मिकेल अर्टेटाको दुई सय ५०औं खेल सुखद बन्यो । आर्सनलले शीर्ष स्थानको लिभरपुलसँगको दुरी ६ अंकमा झारेको छ । चौथो स्थानमा रहेको आर्सनलको १२ खेलबाट २२ अंक छ । नटिङगम १९ अंकसहित सातौं स्थानमा छ ।
