ललितपुर । एन्फा अन्डर एटिन लिगमा आजै भएको दोस्रो खेलमा न्युरोड टिम एनआरटीले सातदोबाटो युवा क्लबलाई ३ -० ले हराएको छ । एन्फा कम्प्लेक्समा भएको खेलमा एनआरटी लगातार दोस्रो खेलमा विजयी भएको हो ।
एनआरटीका लागि इशान साहले दुई गोल गरे । खेलको ११ मिनेटमा नै इशानले पहिलो गोल गरे । सातदोबाटोका मिसन जिरेलले क्लियर गर्न चाहेको बललाई नियन्त्रणमा लिएर इशानले गोल गरेका थिए ।
त्यसैगरी, खेलको १५ मिनेटमा इशानले व्यक्तिगत दोस्रो गोल पनि गरे । यसपटक रोहन मोक्तानको पासमा इशानले गरेको प्रहार रोक्ने क्रममा सातदोबाटोका डिफेन्डर र गोलकिपर चुक्दा एनआरटी स्कोरिङमा सफल भयो ।
यससँगै पहिलो हाफमा एनआरटीले दुई गोलको अग्रता बनायो । उसले तेस्रो गोल भने निर्धारित समय सकिन दुई मिनेटअघि मात्र गर्यो । यसपटक राजन बुढा गोल गर्न सफल भए । इशानले योहानन लिम्बूलाई छक्काएर मुस्किलले निकालेको पासमा राजनले पोस्ट नजिकैबाट गोल गरेका थिए ।
आजको जितसँगै एनआरटीले ११ खेलबाट २२ अंक बनाएको छ । ऊ फेरि अंकतालिकाको दोस्रो स्थानमा उक्लिएको छ । पराजित सातदोबाटो युथ क्लब भने पुछारबाट दोस्रो स्थानमा संघर्षरत छ ।
