काठमाडौं । भिनिसियस जुनियरको ह्याट्रिक मदतमा रियाल मड्रिडले ला लिगामा ओसासुनामाथि ४-० गोलको जित हात पारेको छ । खेलका क्रममा एडर मिलीटाओ चोटग्रस्त बनेका छन् ।
२६ वर्षीय ब्राजिलियन डिफेन्डर मिलिटाओलाई खेल सुरु भएको ३०औँ मिनेटमानै स्ट्रेचरमा राखेर मैदान बाहिर ल्याइएको थियो । उनको ए सि एल गएको र शल्यक्रिया गर्नुपर्ने क्लबले जारी गरेको विज्ञप्तीमा जनाइएको छ ।
मिलिटाओ अब केही महिना मैदान बाहिर रहनेछन् । जारी सिजन रियालका लागि ए सी एलको चोट बोक्ने उनी दोस्रो खेलाडी हुन् । यसअघि डानी कार्भाहाल पनि यहि चोटको शिकार भएका थिए ।
रियालका लागि ३४औँ मिनेटमा भिनिसियसले गोलको खाता खोलेका थिए । ४२ औं मिनेटमा जुड बेलिङगमले गोल गरे । भिनिसियसले ६१ र ६९ औं मिनेटमा गोल गर्दै ला लिगामा आफ्नो दोस्रो ह्याट्रिक पूरा गरेका हुन् ।
