काठमाडौं । घरेलु टोली पाकिस्तानले इंग्ल्यान्डविरुद्धको पहिलो टेस्टमा लज्जास्पद हार बेहोरेको छ । पाकिस्तान इंग्ल्यान्डसँग एक इनिङ्स र ४७ रनले पराजित भएको हो ।
पहिलो इनिङ्समा ५ सय ५६ रन बनाएर पनि पाकिस्तानी टोली पराजित हुन पुग्यो । पाकिस्तानले पहिलो इनिङ्समा ५ सय प्लस रन बनाएर टेस्ट इनिङ्ससहित हार्ने पहिलो टिमको रुपमा खराब कीर्तिमान बनायो । यस जितसँगै भ्रमण टोलीले सिरिजमा १-० को अग्रता बनाएको छ ।
मुलतानमा पाकिस्तानले टस जितेर ब्याटिङ गर्ने निर्णय गरेको थियो । घरेलु टोलीले पहिलो इनिङ्समा ५ सय ५६ रनको बलियो स्कोर बनाएको थियो । अब्दुल्लाह शफिकले १ सय २, कप्तान शान मसूदले १ सय ५१ र सलमान आगाले १ सय ४ रनको शतकीय पारी खेलेका थिए । इंग्ल्यान्डका ज्याक लिचले ३ विकेट लिएका थिए ।
इंग्ल्यान्डले ८ सय २३ रन बनाउँदा ७ विकेट गुमाएको अवस्थामा पहिलो इनिङ्स घोषणा गर्यो । इंग्ल्यान्डका लागि जो रुटले २ सय ६२ र ह्यारी ब्रुकले ३ सय १७ रन बनाए । यो जोडीले संयुक्तरुपमा ४ सय ४५ रन बनाउँदै इंग्ल्यान्डाका लागि कुनै पनि विकेटको रुपमा उच्च साझेदारी गरे । रुट इंग्लयान्डका लागी टेस्ट क्रिकेटमा सर्वाधिक रन बनाउने खेलाडी बने ।
२ सय ६७ रनले पछि परेको अवस्थाबाट पाकिस्तानले दोस्रो इनिङ्स सुरुवात गर्दा टेस्ट बराबरी उन्मुख थियो । तर चौथो दिनको समाप्तिमा पाकिस्तानले ६ विकेट गुमाएर १ सय ५२ रन बनाएपछि घरेलु टोली दबाबमा आएको थियो । अन्तिम दिनको सुरुवातमै २९ रन जोड्दा बाँकी ३ विकेट गुमाएपछि पाकिस्तान २ सय २० रनमा अल आउट भयो । पाकिस्तानका अब्रार अहमद चोटका कारण ब्याटिङमा आउन सकेनन् ।
इंग्ल्यान्डविरुद्ध इनिङ्ससहित लज्जास्पद हार बेहोरेको पाकिस्तानले पछिल्ला ४४ महिना यता कुनै टेस्ट जित्न सकेको छैन । दुई देशबीचको दोस्रो खेल आगामी मंगलबारदेखि यही मैदानमा हुने छ ।