काठमाडौं । पाकिस्तानको बलुचिस्तानमा कोइला खानीमा काम गरिरहेका मजदुरमाथि बन्दुकधारी समूहले आक्रमण गरेर २० जनाको हत्या गरेको छ ।
बलुचिस्तान प्रान्तस्थित दुक्की जिल्लामा भएको आक्रमणमा अन्य ७ जना मजदुर घाइते भएका छन् । अज्ञात समूहले दुक्की प्रहरी चौकी क्षेत्रमा हमला गरेको अधिकारीहरुले जनाएका छन् ।
मजदुरमाथि गोली प्रहार भएको स्थान दुक्की शहरबाट करिब आठ किलोमिटर टाढा पर्छ । बन्दुकधारीले कोइला खानीनजिक कामदारलाई निशाना बनाएर आक्रमण गरेको बताइएको छ । मृत्यु हुनेमा चार जना अफगानिस्तानका कामदार हुन् । अरु पाकिस्तानकै हुन् ।
खानी मजदुरमाथि भएको आक्रमणको जिम्मेवारी कुनै समूहले लिएको छैन । यद्यपी यसअघि यस्ता घटनाको जिम्मेवारी बलोच लिबरेसन आर्मी-बीएलएले लिने गरेको थियो ।
