काठमाडौै । राजनीतिक दल र उम्मेदवारहरुको चुनावी खर्च हेर्नका लागि पनि निर्वाचन आयोगले अनुगमन थालेको छ । आयोगले कोष तथा लेखा नियन्त्रण कार्यालयका प्रमुखलाई अनुगमन अधिकृत तोकेको हो ।
दल वा उम्मेदवारले तथा निर्वाचन प्रतिनिधि र सार्वजनिक पद धारण गरेको व्यक्तिले
सार्वजनिक सम्पत्ति प्रयोग गरे वा नगरेको हेर्ने अधिकार पनि अनुगमन अधिकृतलाई दिइएको छ ।
यसैगरी कानुन विपरित आर्थिक सहयोग लिए/नलिएको, प्रचार प्रसारमा तोकेको हद अनुसार खर्च गरे/नगरेको लगायतका १० विषयमा सूचना संकलन पनि गरिनेछ ।
आयोगले समानुपातिक निर्वाचन प्रणालीतर्फको मतपत्र छपाइ सकेर प्रत्यक्षतर्फको पनि मतपत्र छपाइ थालेको छ ।
समानुपातिक निर्वाचन प्रणालीका लागि २ करोड ८ लाख ५४ हजार ८ मतपत्र छपाइ सम्पन्न भएको हो । प्रत्यक्षतर्फको निर्वाचन प्रणालीका लागि आवश्यक पर्ने २ करोड ३ लाख २३ हजार मतपत्र छपाइको काम समेत आजदेखि सुरु भएको छ । अबको १५ दिनभित्र मतपत्र छपाइको कार्य सम्पन्न गरेर निर्वाचन केन्द्रमा ढुवानी थाल्ने आयोगको तयारी छ । अगामी फागुन ५ भित्र मतदान क्षेत्र र मतदानस्थलमा मतपत्र पुर्याइसक्ने लक्ष्य आयोगले लिएको छ ।
