काठमाडौं । नेपाली कांग्रेसका नेता प्रदीप पौडेलले प्रदेश सरकारमा तीन जना मन्त्री भए पुग्ने बताउनुभएको छ ।
मंगलबार राजधानीमा आयोजित एक कार्यक्रममा उहाँले यस्तो बताउनुभएको हो । उहाँले नेपालको प्रशासनिक संरचनालाई पूर्णरूपमा डिजिटलाईज गर्नुपर्नेमा जोड दिनुभयो । संघीयतालाई कम खर्चिलो बनाउन डिजिटलाईजेसन गर्नुपर्ने उहाँको भनाइ छ ।
उहाँले प्रदेशमा मुख्यमन्त्री, वित्तीयमन्त्री र प्रशासनमन्त्री भए हुने बताउनु भयो । संघीयता हटाउनु समाधान नभइ छरितो बनाउनु आजको आवश्यकता रहेकाे उहाँले औँल्याउनुभयो । संघीयता छरितो बनाउनको लागि चालु खर्च घटाउनुपर्नेमा उहाँले जोड दिनुभयो ।
चालु खर्च कम गर्नको लागि सरकारी संरचनालाई डिजिटलाईजेसन गर्नुको विकल्प नभएको उहाँले बताउनु भयो । प्रशासनिक संरचनालाई पूर्णरूपमा डिजिटलाईज गर्नसके नेपालको चालु खर्च दुई तिहाइ कटौती हुने उहाँको दाबी छ ।
उहाँले प्रविधि विकास र नागरिकको स्वतन्त्रता पनि जोडिएको बताउनु भयो । प्रविधिको प्रयोगलाई सिर्जनात्मक रूपमा प्रयोग गर्न कानूनी स्पष्टता जरूरी रहेको उहाँको भनाइ छ । कानुन निर्माण गर्दा नागरिकको स्वतन्त्रता हनन हुनेगरी गर्न नहुनेमा पनि उहाँले स्पष्ट पार्नुभयो ।
उहाँले सामाजिक सञ्जाललाई नेपालमा दर्ता गर्ने कुरामा समस्या नरहे पनि दर्ताको नाममा बन्द गरिने कार्य भने सह्य नहुने बताउनु भयो । नागरिकको स्वतन्त्रता हनन हुनेगरी कुनै कानुन बनाउन नहुने उहाँको भनाइ छ ।
