काठमाडौं । प्रधानमन्त्री केपी शर्मा ओलीले राष्ट्रिय स्वतन्त्र पार्टी-रास्वपालाई लक्षित गर्दै भवितव्यले खुलेका पार्टीहरू देशमा अराजकता फैलाउन उद्दत रहेको टिप्पणी गर्नुभएको छ ।
शुक्रबार मधेस प्रदेश प्रहरी कार्यालयको प्रशासनिक भवन उद्घाटन कार्यक्रमलाई जनकपुरमा सम्बोधन गर्दै उहाँले यस्तो टिप्पणी गर्नुभएको हो । केही पार्टीहरूले आफूलाई नयाँ भन्दै जनतामा भ्रम फैलाइरहेको उल्लेख गर्दै यसतर्फ नागरिक स्वयं सचेत रहनुपर्ने तर्क गर्नुभयो ।
उहाँले मुलुकको शान्ति व्यवस्था खल्बल्याउन तथा देशलाई प्रतिगमनतिर लैजानसमेत प्रतिगामी तत्वहरू सक्रिय रहेको उल्लेख गर्नुभयो । विगतमा भएका राजनीतिक घटनाहरूको स्मरण गर्दै उहाँले केही शक्तिहरू त्यस्तै घटनाहरू दोहोर्याउने हेतुले राजतन्त्र फर्काउने अभियानमा लागिरहेको उहाँले टिप्पणी गर्नुभयो ।
उहाँले नेपाली नागरिकलाई सुखी र मुलुकलाई समृद्ध बनाउन ढिला भइसकेकोले नयाँ संकल्पका साथ अगाडी बढ्नुपर्ने आजको आवश्यकता भएको बताउनु भयो ।
कानून र संवादको माध्यमबाट निष्कर्षमा पुगिने कुराहरुमा जोरजोलुम गर्ने परिपाटीको अन्त्य गरिनुपर्ने पनि बताउनु भयो ।
