काठमाडौं । विपक्षी दलहरू राष्ट्रिय स्वतन्त्र पार्टी र राष्ट्रिय प्रजातन्त्र पार्टीले सदन अवरूद्ध गरेको साढे दुई महिना बितिसकेको छ । यो अवधिमा उनीहरूसँग संवाद गर्न चासो नदिनुभएका प्रधानमन्त्री केपी शर्मा ओलीले बुधबार प्रतिनिधि सभा बैठकमा उनीहरूप्रति नै व्यंग र कटाक्ष गर्न छाड्नु भएन ।
तुर्कमेनिस्तान भ्रमणबारे जानकारी गराउन रोष्ट्रम पुग्नु भएका प्रधानमन्त्रीले करिब १ घण्टा लामो सम्बोधन विपक्षीप्रतिको आलोचना र सरकारको उपलब्धिमा खर्चनुभयो ।
आफ्नो सम्बोधनमा विपक्षी र आलोचकप्रति कडा कटाक्ष गर्ने पूरानै शैली दोहोर्याउँदै प्रधानमन्त्री केपी शर्मा ओली आज पनि राष्ट्रिय स्वतन्त्र पार्टीप्रति खनिनुभयो । उहाँले झुटा कथा सिर्जना गरेर सदनलाई सोसल मिडियाका लागि कन्टेन्ट उत्पादन गर्ने थलो बनाउने प्रयास गरेको आरोप लगाउनुभयो ।
यतिमात्र नभई भिजिट भिसा प्रकरणलाई लिएर रास्वपाले निरन्तर गरेको विरोधप्रति कटाक्ष गर्दै भिजिट भिसामा गएर फर्किएका व्यक्तिले अन्तर्राष्ट्रिय विमानस्थलमा प्लेन चढ्ने सबै नागरिक बेचिएको भन्ने भाष्य स्थापित गर्न खोजेको टिप्पणी गर्नुभयो ।
प्रधानमन्त्री ओली सदनमा होस् या सार्वजनिक मञ्चहरूमा, कांग्रेस-एमालेको सरकार नढल्ने र चौरासीसम्मै यही गठबन्धन जान्छ भन्ने दाबी गर्न कहिल्यै छुटाउनुहुन्न । आज पनि उहाँले यही कुरा दोहोर्यानुभयो । राजनीतिक अस्थीरता अन्त्य गर्न वर्तमान सरकार गठन भएको उहाँको भनाइ थियो ।
सरकारले १ वर्षमा गरेको फेहरिस्त सुनाउँदै प्रधानमन्त्री ओलीले प्रगति सुन्न गाह्रो भयो होला भनेर विपक्षीलाई व्यंग गर्नुभयो । उहाँले एक वर्षभित्र ३ दर्जन कानुन संशोधन भएको बताउनुभयो । तर संघीयता कार्यान्वयसँग सम्बन्धित कानुन भने अझै बन्न सकेको छैन । संघीय निजामती सेवा विधेयकदेखि प्रहरी र विद्यालय शिक्षा विधेयक यही अधिवेशनमा पारित गर्ने भनिए पनि सहमति नहुँदा तिनले गति लिन सकेका छैनन् ।
प्रधानमन्त्री ओलीले सरकार गठनको १ वर्षमा आर्थिक, राजनीतिकदेखि स्वास्थ्य, शिक्षा, पुर्वाधार निर्माणलगायतका क्षेत्रमा उल्लेख्य प्रगति हासिल गरेको दाबीसहितका विवरण प्रस्तुत गर्नुभयो । तर अझै पनि किसानहरू भुक्तानी नपाए मर्कामा परिरहेका छन् भने मधेश प्रदेशलाई सुख्खा क्षेत्र घोषणा गरे पनि समस्या समाधान हुन सकेका छैनन् ।
त्यसैगरी प्रधानमन्त्री ओलीले सरकारले बहुबिवाहलाई मान्यता दिने गरी कानुन नल्याउने पनि प्रष्ट पार्नुभयो । सरकारलाई थाहा नै नभएको विषयमा हल्ला फैलाएको भन्दै उहाँले रोश प्रकट गर्नुभयो।
प्रधानमन्त्री ओलीले आर्थिक क्षेत्रमा पनि प्रगति भएको भन्दै विवरण सुनाइरहँदा नेपाल सम्पत्ति शुद्धीकरणको ग्रे लिस्टबाट अझै २ वर्ष निष्कन मुस्किल हुने विज्ञहरूले औंल्याएका छन् ।
सामाजिक न्याय,आर्थिक समृद्धि र सुशासनको लक्ष्य प्राप्तिका लागि काम गरिरहेको प्रधानमन्त्री ओलीले दोहोर्याउनुभयो । तर आफ्नै मन्त्रिहरूमाथि लागेको आरोपमा अनुसन्धान गर्न प्रधानमन्त्रीले रूचि देखाउनुभएको छैन ।
