काठमाडौं । राष्ट्रिय प्रजातन्त्र पार्टीले चैत १५ गते काठमाडौंको तीनकुनेमा भएको हिंसात्मक घटनाको सत्यतथ्य र निष्पक्ष छानबिन गर्न पूर्वन्यायाधीशको अध्यक्षतामा न्यायिक आयोग गठन गर्न सरकारसँग माग गरेको छ ।
राप्रपा अध्यक्ष राजेन्द्र लिङ्देनसहितका नेताहरुले आज सिंहदरबारमा पुगेर कार्यवाहक प्रधानमन्त्री प्रकाशमान सिंहलाई ज्ञापनपत्र बुझाउँदै तीनकुने घटनाको छानबिन गर्न न्यायिक आयोग गठनको माग गरेका हुन् । ज्ञापनपत्र बुझाउँदै अध्यक्ष लिङ्देनले शान्तिपूर्ण कार्यक्रममा सरकारले दमन गरेको आरोप लगाउनुभयो । सरकारको एकपक्षीय छानबिनले पीडितलाई न्याय दिन नसक्ने भन्दै राप्रपाले पूर्वन्यायाधीशको नेतृत्वमा न्यायीक समितिको माग गरेको हो ।
ज्ञापनपत्र बुझ्दै कार्यवाहक प्रधानमन्त्री सिंहले कानुनअनुसार नै घटनामा संलग्नहरुबारे अनुसन्धान भइरहेको जानकारी दिनुभयो ।
राप्रपाले तीनकुने घटनाको स्वतन्त्र छानबिनका लागि गृहमन्त्रीले राजीनामा दिनुपर्ने र प्रहरी कमान्डर र तथा प्रशासनिक कर्मचारीलाई निलम्वन गर्नुपर्ने मागसमेत गरेको छ । त्यसैगरी, पक्राउ परेका राप्रपा नेताहरु रविन्द्र मिश्र र धवल शमशेर राणा लगायतलाई तत्काल रिहा गर्न पनि राप्रपाले माग गरेको छ ।
