मकवानपुर । प्रतिपक्ष दलले आफूहरूसँगको सहमति कार्यान्वयन नभएसम्म प्रदेशसभाको बैठक सञ्चालन हुन नदिने अडान राखिरहेका बेला बागमती प्रदेश सरकारले अधिवेशन अन्त्य गर्ने निर्णाय गरेको छ ।
बुधवार बसेको सर्बदलीय बैठकमा सहमति नजुटेपछि प्रदेशसभा बैठक सूचना टाँस गरी स्थगित भयो । बैठक स्थगित भएको सूचना टाँस भएलगत्तै प्रदेशसभा अधिवेशन नै अन्त्य भएको पत्र प्रदेश प्रमुखबाट प्राप्त भएको सभामुख भुवनकुमार पाठकले जानकारी दिनुभएको छ ।
बजेट बाँडफाँटमा दलीय सहमति नहुँदा मंगलबारका लागि बोलाइएको बैठक सूचना टाँसेर स्थगन भएको थियो । चालु आर्थिक वर्षको बजेट बाँडफाँटमा सरकारले सन्तुलन कायम गर्न नसकेको र विगतका सहमति कार्यान्वयन नभएको भन्दै प्रतिपक्ष दल माओवादी केन्द्रले बैठक अवरुद्ध गर्ने जनाउ दिएपछि सभामुख भुवनकुमार पाठकले सहमतिका लागि सदनमा प्रतिनिधित्व गर्ने दलहरुसँग छलफल गर्नुभएको थियो ।
दलहरुबीच छलफल गर्ने र कार्यव्यवस्था तथा परामर्श समितिको बैठक राखेर सदन सञ्चालन गर्ने तयारी गरिरहेका बेला सरकारले अधिवेशन अन्त्य गर्ने निर्णय गरेको हो ।
बागमती प्रदेशसभाका विपक्षी दलहरूले सरकार सहमति कार्यान्वयनबाट पछि हटेर अधिवेशन अन्त्य गरेको भन्दै असन्तुष्टि जनाएका छन् । प्रतिपक्षी दलहरुले बुधवार हेटौँडामा पत्रकार सम्मेलन गर्दै सरकार निरङ्कुशताको बाटोमा हिँडेको आरोप लगाए ।
यसैबीच, बागमती प्रदेशसभाको सचिवमा रामकुमार पौडेल नियुक्त हुनुभएको छ । बुधवार प्रदेश प्रमुख दीपकप्रसाद देवकोटाले प्रदेशसभा सचिवमा पौडेललाई नियुक्त गर्नुभएको हो ।
