काठमाडौं । चैत १५ गते काठमाडौंको तीनकुने, कोटेश्वर र जटिबुटी क्षेत्रमा राजावादी समूहको प्रदर्शनका क्रममा भएको आगजनी, तोडफोडलगायतका हिंसात्मक गतिविधिको छानबिन गर्न न्यायिक समिति गठन गर्न चौतर्फी माग भइरहँदा पनि सरकारले बेवास्ता गरेको छ । सञ्चारगृह, व्यापारिक प्रतिष्ठान, सरकारी कार्यालय र व्यक्तिका घरमा राजावादी समूहले गरेको हिंसात्मक गतिविधिले संघीय लोकतान्त्रिक प्रणालीमाथि नै धावा बोलेको छ ।
प्रधानमन्त्री केपी शर्मा ओली आफैंले घटनाका योजनाकार भनेर पूर्वराजा ज्ञानेन्द्र शाहको नाम लिइसक्दा समेत उनलाई किन जिम्मेबार बनाउन सकिरहेका छैनन् ? यति ठूलो मात्रामा क्षति र संलग्न दोषीलाई कारबाहीका लागि अनुसन्धान गर्न न्यायिक छानबिन समिति गठनका लागि सरकार किन मौन बसिरहेको छ त ?
राजावादी समूहले चैत १५ गते गरेको हिंसात्मक प्रदर्शनमा दुई जनाको मृत्यु भयो भने कान्तिपुर टेलिभिजनसहित सञ्चारगृहमा आक्रमण र तोडफोड भयो । सरकारी स्वामित्वको जटिबुटी कम्पनी र व्यक्तिगत घरमा आगजनी नै गरियो । भाटभटेनी सुपरमार्केटसहित तीनकुने र कोटेश्वर आसपासका निजी घरमा तोडफोड, लुटपाट आगजनी भयो ।
राजावादी समूहले गरेको यो ज्यादती जनतामाथिको निर्मम प्रहार हो । घटनामा नेपाल प्रहरी, सशस्त्र प्रहरी र प्रदर्शनकारी गरी १ सय २९ जना घाइते भएका छन् । यो घटनामा संलग्न रहेको आरोपमा प्रहरीले अहिलेसम्म ५९ जनालाई पक्राउ गरेर म्याद थप गरी अनुसन्धान जारी राखेको छ । तर, घटनाका मुख्य आरोपी ठानिएका दुर्गा प्रसाई अहिलेसम्म फरार छन् । घटनामा आफू चढेको गाडी सुरक्षाकर्मीमाथि जबरजस्ती पेल्ने घटनाले सिंगो प्रहरी संगठनमाथि नै धावा बोलेको प्रष्ट देखिएको छ ।
प्रधानमन्त्री केपी शर्मा ओलीले घटनाका योजनाकार पूर्वराजा ज्ञानेन्द्र शाह भएको किटानी नै गरिसक्नु भएको छ । सत्तारुढ दलदेखि प्रमुख विपक्षीदलसहितले घटनाका मुख्य दोषी शाह नै भएको सार्वजनिकरुपमा आरोप लगाइरहेका छन् । तर, सरकारले घटनाको सत्यतथ्य पत्ता लगाउन न्यायिक छानबिन समिति बनाउन सकेको छैन । सत्तापक्षदेखि विपक्षीसम्मले घटनाको छानबिन गर्न समिति गठनको माग गरिरहेका छन् ।
त्यसो त मन्त्रिपरिषद्ले घटनाको छानबिन गर्न गृह मन्त्रालयलाई निर्देशन दिएको छ । तर, १५ गतेको घटनामा सुरक्षा संयन्त्रको कमजोरी रहेको भन्दै आलोचना भइरहेका बेला सत्तागठबन्धन दलका नेताहरुले समेत छानविनका लागि न्यायीक समितिको माग गरेका छन् । नेपाल प्रहरी नै घटना छानबिन गर्न सक्षम रहेको गृहमन्त्रालयका प्रवक्ता रामचन्द्र तिवारीको भनाइ छ ।
चैत १५ गते तीनकुनेमा भएको घटनाको क्षतिको तथ्यांक संकलन भइसके पनि यकिन गरेर सार्वजनिक गर्ने तयारी गृह मन्त्रालयको छ ।
राजावादीहरुको समूहले दुई जनाको मृत्यु हुनेगरी गरेको हिंसात्मक प्रदर्शन, आगजनी, लुटपाट र तोडफोडले आम नागरिकमा त्रास छ । सामाजिक सञ्जालमा आरोप प्रत्यारोप चलिरहेको छ । तर घटनाका मुख्य जिम्मेवार पत्ता लगाउन र कारबाहीको दायरामा ल्याउन न्यायिक समिति गठनमा अलमल हुँदा नागरिकमा अन्योल देखिएको छ ।