काठमाडौं । पूर्वप्रधानमन्त्री तथा नेकपा एकीकृत समाजवादीका नेता झलनाथ खनालले मदनकुमार भण्डारी र जीवराज आश्रतिलाई हत्या गरेर नदीमा फालिएको दाबी गर्नुभएको छ ।
पार्टी कार्यालय काठमाडौंमा आज आयोजित ३१औं मदन-आश्रित स्मृति दिवसमा पूर्वप्रधानमन्त्री खनालले मदन र आश्रितको मृत्यु दुर्घटनाबाट नभइ निर्ममतापूर्वक गरिएको हत्या भएको दाबी गर्नुभएको हो ।
नदीमा खसेको गाडी लक भेटिएको तर शव टाढा पुगेको, पानीमा डुब्दा पनि फोक्सो सुक्खा भेटिएको जस्ता प्रमाणले पनि घटना हत्या नै हो भन्ने यकिन हुने नेता खनालको दाबी छ ।
नेकपा एमालेका तत्कालीन महासचिव मदन भण्डारी र संगठन विभाग प्रमुख जीवराज आश्रतिले नेपालको कम्युनिस्ट आन्दोलन नयाँ उचाईमा उठाएको पूर्वप्रधानमन्त्री खनालको भनाइ छ ।
कम्युनिस्ट नेता भण्डारी र आश्रितको २०५० जेठ ३ गते दासढुंगामा भएको जिप दुर्घटनामा निधन भएको थियो । एमालेकै कैयौं नेताहरुले घटनालाई हत्या भन्ने गरेका छन् । तर एमाले सधैंजसो सरकारमा भए पनि सत्यतथ्य छानबिनमा चासो भने दिएन ।
