धनगढी । दाबी पेस भएको दुई दिन बितिसक्दा पनि प्रदेश प्रमुखले निर्णय नगर्दा सुदूरपश्चिममा मुख्यमन्त्री नियुक्ति प्रक्रिया अन्योलमा परेको छ । नागरिक उन्मुक्ति पार्टीका दुईजना प्रदेशसभा सदस्यले हिजो छुट्टाछुट्टै दाबी पेस गरेपछि प्रदेश प्रमुख नजिर मियाँले कानुनी परामर्श लिनुपर्ने भन्दै नियुक्तिमा ढिलाइ गरेका हुन् ।
तर चार पार्टीका संसदीय दलका नेताले स्पष्ट बहुमतसहित हस्ताक्षर गरेर बुझाउँदा पनि प्रदेश प्रमुखले पूर्वाग्रह राखी मुख्यमन्त्री नियुक्त नगरेको भन्दै कांग्रेस असन्तुष्ट बनेको छ । प्रदेश प्रमुखले आह्वान गरेबमोजिम संविधानको धारा १६८ को उपधारा (२) बमोजिम मुख्यमन्त्रीमा दाबी पेस गरिएको भन्दै मुख्यमन्त्री नियुक्त नगर्नु कानुनविपरीत भएको नेपाली कांग्रेसका प्रमुख सचेतक विक्रमसिंह धामीको दाबी छ ।
यसैबीच केन्द्रीय गठबन्धनले मुख्यमन्त्री नदिएको आक्रोशमा सुदूरपश्चिममा कांग्रेससहितको गठबन्धनलाई सहयोग गरेको एकीकृत समाजवादीले निर्णय कुनै हालतमा फिर्ता नहुने अडान लिएको छ ।
एकीकृत समाजवादी सुदूरपश्चिम प्रदेशका संसदीय दलका नेता दीर्घ सोडारीले गठबन्धनका नेता केपी ओली र पुष्पकमल दाहालले आफूहरुमाथि अपमान गरेको प्रतिक्रिया दिएका छन् । उनले ओली-दाहालले गरेको बदला आफूहरुले सुदूरपश्चिम प्रदेशबाट लिएको जनाएका हुन् । उनले यसबाट आफूहरु र आफ्नो पार्टी पछि नहट्ने दाबीसमेत गरेका छन् ।
‘गठबन्धनका नेता केपी ओली र पुष्पकमल दाहलले गरेको अपमानको बदला सुदूरपश्चिममा लिएका हौं । पछि हट्दैनौं,’ एकीकृत समाजवादी सुदूरपश्चिम प्रदेश संसदीय दलका नेता दीर्घ सोडारीले कान्तिपुर टेलिभिजनसँग भने ।
सुदूरपश्चिममा नागरिक उन्मुक्ति पार्टीका लक्ष्मणकिशोर चौधरी र कैलाश चौधरीको मुख्यमन्त्रीमा दाबी परेको छ ।
यो पनि...
ओली र दाहालले गरेको अपमानको बदला सुदूरपश्चिममा लिन्छौं : दीर्घ सोडारी
एकीकृत समाजवादीले गठबन्धनलाई कमजोर बनाउन खोज्यो : केपी ओली
सुदूरपश्चिम सरकार गठन, सत्ता गठबन्धनबीच खटपट
नाउपाकी सांसद इन्दिरा गिरीलाई पदमुक्त नगर्न सर्वोच्चको आदेश
मुख्यमन्त्रीमा नाउपाबाट दुई जनाको दाबी, पेचिलो बन्यो सरकार गठन
