काठमाडौं । नेकपा एकीकृत समाजवादी का सम्मानित नेता झलनाथ खनालले आफूहरु सरकारमा अहिल्यै नजाने स्पष्ट पारेका छन् ।
निर्वाचन प्रणाली सुधारका सम्बन्धमा निर्वाचन आयोगले राखेको छलफलमा सहभागी हुन बिहीबार सिंहदरबार पुगेका खनालले सञ्चारकर्मीहरुलाई संक्षिप्त प्रतिक्रिया दिँदै सरकारमा जाने तयारी नभएको जनाए । उनले सरकारलाई आफूहरुले दिएको समर्थन जारी रहने पनि जानकारी दिए ।
सरकारले राम्रो काम गरुन्जेल आफूहरुको समर्थन रहने उनको भनाइ छ । ‘समर्थनचाहिँ हामीले गरेकै छौँ । समर्थन हाम्रो जारी नै रहन्छ । सरकारले राम्रो काम गरुन्जेल । अथवा नराम्रो काम नगरुन्जेल । नराम्रो काम नगरुन्जेल हाम्रो समर्थन रहन्छ । तर अहिले सरकारमा जानेकुरा हाम्रो त्यस्तो केही छैन,’ खनालले भने ।
उनले प्रधानमन्त्री पुष्पकमल दाहालले नेकपा एकीकृत समाजवादीलाई सरकारका आउन गरेको आग्रहबारे आफूलाई थाहा नभएको प्रतिक्रिया पनि दिए ।
