काभ्रे । काभ्रे जिल्लाको नमोबुद्ध नगरपालिका-६ फेदीस्थित बिपी राजमार्गमा शुक्रबा बिहान भएको सवारी दुर्घटनामा तीनजना घाइते भएका छन्।
दुर्घटना बिहान करिब ९ : ३५ बजे काठमाडौंबाट सिन्धुलीतर्फ जाँदै गरेको बा ५ ख १५०१ नम्बरको हायस र विपरीत दिशाबाट आउँदै गरेको बा ५ ख ८६८२ नम्बरको यात्रुबाहक बस एकआपसमा ठोक्किँदा भएको हो।
दुर्घटनामा हायस चालक धादिङ, गल्छीका ३३ वर्षीय शंकर भुजेल घाइते भएका छन्। उनको दाहिने खुट्टा भाँचिएको छ र हाल धुलिखेल अस्पतालमा उपचार भइरहेको प्रहरीले जनाएको छ।
बसमा सवार घाइतेमध्ये झापा भद्रपुर नगरपालिका-९ का ३७ वर्षीय राजु पौडेलको टाउको, दाहिने हात र खुट्टामा चोट लागेको छ। उनी मेथिनकोट अस्पताल, भकुण्डेमा उपचाररत छन्। त्यस्तै काभ्रे तेमाल गाउँपालिका-५, घिम्दीकी २४ वर्षीया कुमारी तामाङको दाहिने घुँडामा चोट लागेको छ र उनको अवस्था सामान्य रहेको प्रहरीले जनाएको छ।
दुर्घटनापछि दुवै सवारी साधन घटनास्थलमै रहेका छन् भने बाटो अवरूद्ध नभएको प्रहरीले स्पष्ट पारेको छ। बस चालक सिन्धुपाल्चोक चौताराका ३४ वर्षीय राजन गिरीलाई नियन्त्रणमा लिइएको बताइएको छ।
