खोटाङ । खोटाङमा एयर डाइनेस्टीको हेलिकोप्टर दुर्घटना भएको छ ।
काठमाडौंबाट ५ यात्रु बोकेर गएको एयर डाइनेस्टीको नाइन एन ए एफ क्यु कल साइनको हेलिकोप्टरको खोटाङको केपिलासगढी गाउँपालिका–२ खार्ताम्छाको बालाबेसीमा दुर्घटना भएको हो । हेलिकोप्टर अवतरणका क्रममा सन्तुलन गुमाउँदा दुर्घटना भएको नागरिक उड्डयन प्राधिकरणले जनाएको छ ।
बिहान ११ बजे काठमाडौंबाट उडेको हेलिकोप्टर ११ बजेर ५१ मिनेटमा अवतरणका क्रममा दुर्घटना भएको हो । दुर्घटनामा एक यात्रु सामान्य घाइते भएको जनाइएको छ । केपीलासगढी गाउँपालिकाका अध्यक्ष समीर राईले बारीको डिलमा अवतरण गर्नेक्रममा हेलिकोप्टर दुर्घटना भएको जानकारी दिनुभयो ।
सुरुमा डिलमा अवतरण हुन लागेको हेलिकोप्टरलाई उठाएर बारीको बीचमा लैजान खोज्दा दुर्घटना भएको अध्यक्ष राईले बताउनुभयो । यसैबीच उद्धारका लागि काठमाडौंबाट अर्को हेलिकोप्टर पठाइएको नागरिक उड्डयन प्राधिकरणले जनाएको छ ।
.png&w=400&height=300)
