रुपन्देही । राष्ट्रिय स्वतन्त्र पार्टीका सभापति रवि लामिछानेको सहकारी ठगी र संगठित अपराधसम्बन्धी मुद्दामा उच्च अदालत तुलसीपुर, बुटवल इजलासले प्रमाण मिसिल झिकाउने आदेश दिएको छ । उच्च अदालत तुलसीपुर बुटवल इजलासका न्यायाधीश वासुदेव आचार्य र ओमप्रकाश अर्यालको संयुक्त इजलासले बिहीबार प्रमाण मिसिल झिकाउने आदेश दिएको हो ।
मुद्दामा बिहीबार दुवै पक्षका तर्फबाट बहस भएको थियो । लामिछानेको पक्षबाट अधिवक्ता नारायणदत्त कँडेल, महेन्द्र पाण्डे र दीपेन्द्र झाले बहस गर्नुभएको थियो। त्यस्तै, छविराज जोशीका तर्फबाट अधिवक्ता रोचक जोशीले बहस गर्नुभयो । सरकारको तर्फबाट उप–न्यायाधिवक्ता प्रकाश मरासिनी र सह–न्यायाधिवक्ता सन्देश श्रेष्ठले बहस गर्नुभएको थियो। सह–न्यायाधिवक्ता श्रेष्ठको बहस जारी रहँदा समयावधि सकिएको भन्दै इजलासले बिहीबारको कार्यवाही स्थगित गरेको थियो ।
