काठमाडौं । अबको दुई दिन मुलुकका अधिकांश भूभागमा पानी पर्नसक्ने भन्दै सतर्कता अपनाउन जल तथा मौसम विज्ञान विभागले आग्रह गरेको छ ।
गण्डकी र कर्णालीसहितका उच्च पहाडी तथा हिमाली क्षेत्रमा भारी वर्षासहित हिमपात हुनसक्ने पूर्वानुमान विभागको छ । पछिल्ला दुई दिन अर्थात् यही कात्तिक ८ र ९ गते लेक लागेर मनाङ र कास्कीमा गरी चार जनाको ज्यान गएको छभने एक जना स्पेनी नागरिकलाई उपचारका लागि काठमाडौं ल्याइएको छ ।
जल तथा मौसम विज्ञान विभागबाट जारी मौसम पूर्वानुमानअनुसार यही बङ्गालको खाडी र अरब सागरमा बनेको दुई वटा न्यून चापीय प्रणालीले भोलि र पर्सि नेपालमा वर्षा र हिमपात गराउने सम्भावना छ । आज दिउँसो बागमती, गण्डकी, लुम्बिनी, कर्णाली र सुदूर पश्चिम प्रदेशका पहाडी भूभागमा साधारणतया आंशिक बदली तथा बाँकी तराई भूभागमा आंशिक बदली रह्यो ।
पानी पर्ने पूर्वानुमानले पाकेको धानलाई असर गर्ने भन्दै किसान भने चिन्तित बनेका छन् ।
