विराटनगर । कोशी सरकारले प्रदेश सभाको चालु सातौँ अधिवेशन शुक्रबारदेखि अन्त्य गर्ने निर्णय गरेको छ ।
प्रदेश सरकारको शुक्रबार बसेको मन्त्रिपरिषद् बैठकले प्रदेश सभाको अधिवेशन अन्त्य गर्ने निर्णय गरेको हो । जेन-जी पुस्ताले गत भदौ २३ र २४ गते गरेको आन्दोलनका कारण कोशी प्रदेश सभाको सभाकक्ष र कार्यालय तोडफोड र आगजनीबाट ध्वस्त भएको थियो ।
गत जेठ चार गते सुरू भएको सातौँ अधिवेशनमा ४० वटा बैठक बसेका थिए । अधिवेशनले सात वटा विधेयक पारित गरेको छ। पारित गर्ने प्रक्रियामा रहेका प्रदेश आमसञ्चारसम्बन्धी व्यवस्था गर्न बनेको विधेयक र प्रदेश सरकारी भाषा सम्बन्धी व्यवस्था गर्न बनेको विधेयक बाँकी रहेका छन् ।
अघिल्लो अधिवेशनबाट सरेर आएका चार वटा विधेयक मध्ये सरकारी कामकाजको भाषा सम्बन्धमा व्यवस्था गर्न बनेको गैरसरकारी विधेयक प्रदेश सभाले अस्वीकृत गरेको थियो ।
बाँकी तीन वटा विधेयक भने पारित भएका थिए । सातौँ अधिवेशनमा दर्ता भएका सात वटा विधेयक मध्ये पाँच वटा पारित भए भने दुई वटा पारित हुन बाँकी थिए ।
