काठमाडौं । प्रधानमन्त्री केपी शर्मा ओलीले नेपाली भूमि लिपुलेकलाई व्यापारिक मार्गका रूपमा प्रयोग गर्ने गरी भारत र चीनबीच भएको सहमतिप्रति चिनियाँ राष्ट्रपति सी चिनफिङसँग आपत्ति जनाउनुभएको छ ।
राष्ट्रपति सीसँग थियानजीनको अतिथि गृहमा भएको द्विपक्षीय भेटवार्तामा प्रधानमन्त्री ओलीले लिपुलेकबारे दुई देशबीच भएको सहमतिप्रति आपत्ति जनाउनुभएको परराष्ट्र मन्त्रालयले जनाएको छ । यस विषयमा प्रधानमन्त्रीले स्पष्ट रूपमा आपत्ति जनाउनुभएको मन्त्रालयका सचिव अमृतबहादुर राईले जानकारी दिनुभयो ।
सन् १८१६ को सुगौली सन्धिबमोजिम महाकालीपूर्वका सबै भूभागहरू सार्वभौम नेपालको भएको स्पष्ट रहेको उल्लेख गर्दै प्रधानमन्त्री ओलीले यस मामिलामा चीनले नेपाललाई सहयोग गर्ने अपेक्षा व्यक्त गर्नुभएको सचिव राईले बताउनुभयो ।
राष्ट्रपति सीसँगको सौहार्दपूर्ण र द्विपक्षीय भेटमा दुई देशबीचको मित्रवत सम्बन्ध र सहकार्यका विविध क्षेत्रमा कुराकानी भएको र सहकार्य बढाउन दुई देशका संयन्त्र अग्रसर हुने समझदारी भएको प्रधानमन्त्रीको सचिवालयले जनाएको छ ।
प्रधानमन्त्री ओली सांघाई सहयोग संगठन-एससीओको २५औं शिखर सम्मेलनमा सहभागी हुन आजै चीनको थियानजीन पुग्नुभएको हो । सम्मेलनका क्रममा भारतीय समकक्षी नरेन्द्र मोदीसँग पनि भेटवार्ता हुने अपेक्षा गरिएको छ। भारत र चीनले गरेको सहमतिप्रति नेपालले औपचारिक रूपमा विरोध जनाइसकेको छ।
थियानजीनमा प्रधानमन्त्रीसहितको टोलीलाई चीन सरकारका उच्च अधिकारी, चीनका लागि नेपाली राजदूत कृष्णप्रसाद ओली, नेपालका लागि चिनियाँ राजदूत चेन सोङलगायतले स्वागत गर्नु भएको थियो। एससीओ बैठक १५-१६ भदौमा चीनको थियानजीनमा हुँदैछ।
नेपाल ‘संवाद साझेदार’ का रूपमा एससीओमा सहभागी हुन लागेको हो। प्रधानमन्त्री ओलीले सम्मेलनका अवसरमा ‘एससीओ प्लस’ बैठकलाई सम्बोधन गर्नुहुनेछ ।
सम्मेलनमा सहभागी अन्य देशका नेताहरूसँग पनि प्रधानमन्त्री ओलीको ‘साइडलाइन’ भेट हुनेछ। प्रधानमन्त्री ओलीले १७ भदौमा चीनका उपराष्ट्रपति हान चङसँग बेइजिङमा भेट गर्नुहुनेछ ।
गत वर्ष प्रधानमन्त्री भएपछि ओलीको यो दोस्रो चीन भ्रमण हो। गत वर्षको मंसिर १७ देखि २० गतेसम्म ओलीले चीन भ्रमण गर्नुभएको थियो ।
