काठमाडौं । अविरल वर्षासँगै आएको बाढीले बागलुङमा रहेकाे १२ किलोवाटको लघु जलविद्युत् आयोजना बगाएको छ ।
बागलुङको जैमिनी नगरपालिका-९ पैयुथन्थापस्थित कालुङखोलामा आएको बाढीले लघु जलविद्युत् आयोजना बगाएको हो ।
खोलामा आएको बाढीले कालुङखोला लघु जलविद्युत आयोजनाका साथै तीन वटा झोलुङ्गे पुल र एक वटा गोरूसमेत बगाएको जिल्ला प्रहरी कार्यालय बागलुङका प्रहरी नायब उपरीक्षक बसन्त पाण्डेले जानकारी दिनुभयो ।
लघु जलविद्युत् बगाएपछि झन्डै एक सय घर परिवार अन्धकारमा बस्न बाध्य छन् । बाढिकै कारण १० घर जोखिमा परेका छन् । उनीहरूलाई अहिले सुरक्षित स्थानमा राखिएको प्रहरीले जानकारी दिएको छ ।
बाढीले स्थानीयको झन्डै पाँच सय भुरी उत्पादन हुने खेतसमेत बगाएको र क्षतिको पुर्ण विवरण आउन बाँकी रहेका प्रहरी नायब उपरीक्षक पाण्डेले जानकारी दिनुभयो ।
