काठमाडौं । सभामुख देवराज घिमिरे अन्तरव्यवस्थापिका संघ (आईपीयू)को महासभामा जलवायु परिवर्तनले पारेको प्रभाव र सामाजिक न्यायमा देखापरेको असमान व्यवहारका विषयमा छलफल भएको बताउनुभएको छ । उज्वेकिस्तानको राजधानी तास्केन्टमा सात दिन चलेको सम्मेलनमा सहभागी भएर आज काठमाडौं फर्कनुभएका सभामुख घिमिरेले त्रिभुवन अन्तर्राष्ट्रिय विमानस्थलमा पत्रकारहरूसँग कुरा गर्दै जलवायु परिवर्तन र द्वन्द्वले विश्वलाई पारेको प्रभाव न्यूनीकरणबारे छलफल भएको जानकारी दिनुभयो ।
उहाँले हिमाली राष्ट्रका लागि जलवायु न्याय अनिवार्य भएको भन्दै अन्तर्राष्ट्रिय साझेदारीमा सन्तुलन कायम गरेर अघि बढ्नुपर्नेमा आफूले जोड दिएको बताउनुभयो ।
सम्मेलनमा संसद्को कामकारबाही, असंलग्न राष्ट्रहरूको आन्दोलनलाई प्रभावकारी बनाउने विषयमा समेत छलफल भएको उहाँको भनाइ थियो ।
आईपीयूअन्तर्गतको दिगो विकास स्थायी समितिको सदस्यमा राष्ट्रिय सभाका सांसद अञ्जान शाक्य र स्वास्थ्य सम्बन्धी समितिको सदस्यमा सांसद सोविता गौतम विजयी हुनुभएको छ । आईपीयूको सम्मेलनमा १८२ राष्ट्रका प्रतिनिधि सहभागी भएका थिए ।
