रूपन्देही । राष्ट्रिय स्वतन्त्र पार्टी (रास्वपा)का सभापति एवं गोरखा मिडिया नेटवर्कका तत्कालीन प्रबन्ध निर्देशक रवि लामिछाने भैरहवास्थित जिल्ला कारागार चलान भएका छन् । सोमबार बिहान जिल्ला अदालत रूपन्देहीमा पेश गरिएसँगै लामिछाने कारागार चलान भएका हुन् ।
जिल्ला कारागारका प्रशासक सुरेश भण्डारीका अनुसार लामिछानेलाई भैरहवा कारागारको ब्लक नम्बर ४ मा राखिएको छ । “हामीकहाँ ४ वटा ब्लक छन् । त्योमध्ये ब्लक नम्बर ४ मा राखिएको छ”, कारागार प्रशासक भण्डारीले बताउनुभयो ।
लामिछानेलाई हाल एक्लै राखिएको छ । पछि कैदीबन्दीको संख्या थप भएमा अरूलाई पनि रविसँगै राखिने भण्डारीले बताउनुभयो ।
भण्डारीका अनुसार लामिछानेको स्वास्थ्य अवस्था जाँच गरेर कारागारभित्र पठाइएको हो । लामिछानेको स्वास्थ्य अवस्था सामान्य भएको पनि भण्डारीले जानकारी दिनुभयो ।
