अमेरिका । अमेरिकाको भर्जिनिया राज्यमा पोखरीमा डुबेर दुई नेपालीको मृत्यु भएको छ ।
मृत्यु हुनेमा ५५ वर्षीय कर्ण खड्का र २० वर्षीय निश्चल भट्ट रहेको स्थानीय प्रहरीले जनाएको छ । भर्जिनियाको स्यानलीटी शहरको सेन्टरभ्यु ड्राइभ सडक छेउको पोखरीमा कार खसेपछि उनीहरुको मृत्यु भएको प्रहरीको अनुमान छ ।
स्थानीय समय अनुसार बिहीबार बिहान पोखरीमा कार डुबेको दखेपछि नजिकैको अतिथि गृहमा काम गर्ने कर्मचारीले प्रहरीलाई खबर गरेका थिए । कारका चालक खड्का र यात्री भट्ट कार हिउँमा चिप्लिएर पोखरीमा खसेको अनुमान गरिएको छ । फेयरफक्स प्रहरीका अनुसार ५५ वर्षीय खड्का दुर्घटना स्थल नजिकै रहेको विन्डम होटलका कर्मचारी थिए ।
अर्का मृतक २० वर्षीय भट्टलाई सोही होटलमा काम लगाइदिन खड्काले लिएर गएको होटलका कर्मचारीहरुले प्रहरीलाई बताएका छन् । अनुसन्धान जारी रहेकाले थप विवरण आउन बाँकी नै रहेको स्थानीय नेपालीहरुले जनाएका छन् ।
