पश्चिम नवलपरासी । बाक्लो हुस्सु र शीतलहरका कारण पूर्व-पश्चिम राजमार्ग अन्तर्गत बुटवल-नारायणगढ सडक अवरुद्ध भएको छ । पश्चिम नवलपरासीको बर्दघाट नगरपालिका–४ दाउन्नेस्थित खुर्सानी खोलाको सडक चिप्लो भएपछि राजमार्ग अवरुद्ध भएको जिल्ला प्रहरी कार्यालयका सूचना अधिकारी रेशम बोहराले जानकारी दिनुभयो ।
बाटो चिप्लो भएकाले सवारीसाधन चलेका छैनन् । हिजोदेखि नै पश्चिम नवलपरासी र दाउन्ने क्षेत्रमा बाक्लो हुस्सु लागेको छ ।
आज बिहान २ बजेदेखि बाटो दुईतर्फी अवरुद्ध भएको बोहराले बताउनुभयो । बाटो खुलाउन निरन्तर प्रयास भइरहेको उहाँले जानकारी दिनुभयो ।
