काठमाडौं । मौसममा आएको बदलीसँगै उच्च पहाडी तथा हिमाली जिल्लाहरूमा हिमपात भएको छ । गोरखा, बझाङ, बाजुरा, डोटी, डडेल्धुरा, दार्चुला लगायतका उच्च पहाडी तथा हिमाली क्षेत्रमा हिजो साँझदेखि हल्का हिमपात भएको हो ।
गोरखाको दुर्गम उत्तरी भेग चुमनुब्री गाउँपालिका विभिन्न ठाउँमा हिजो साँझदेखि हिमपात भएको छ । चुमनुब्री साम्दो, सामागाउँ, ल्हो, स्याला लगायतको विभिन्न ठाउँ हिउँ परेको ल्होका स्थानीय पेम्बा रेताले जानकारी दिनुभयो । हिउँले उक्त भेग साँझ देखि सेताम्मै भएको छ भने चिसो बढेपछि मानिसहरू घरभित्रै बसेका छन् ।
