कपिलवस्तु । अवैध पेस्तोल सहित मायादेवी गाउँपालिका-६, बडसुडवाका २१ वर्षे सद्दाम हुसेन फकिर पक्राउ परेका छन् । कम्मरमा लुकाईछिपाई राखेको अवस्थामा कालो रंगको ४.५ मिलिमिटर क्यालिबरको ‘डेन्जर टोय एअर’ लेखेको पेस्तोल सहित उनलाई बडसुडवाबाटै इलाका प्रहरी कार्यालय, पकडीको टोलीले पक्राउ गरेको हो ।
उनको साथबाट पेस्तोलमा लाग्ने ४३ थान छर्रा, ६ थान धमाका र एक थान मोबाइल पनि बरामद गरिएको छ । फकिरले मोटरसाइकल चोरी गर्न खोजिरहेको सूचना स्थानीयले प्रहरीलाई दिएपछि प्रहरीले तलासी गर्दा पेस्तोल बरामद भएको जिल्ला प्रहरी प्रवक्ता डीएसपी मोहनमणि अधिकारीले बताउनु भयो । फकिरमाथि हातहतियार खरखजना मुद्दा अन्तर्गत अनुसन्धान भइरहेको प्रहरीले जनाएको छ ।
