काठमाडौं । दशैं आउन दुई दिन मात्र बाँकी छ ।
दशैंका दिन नेपालीहरु आफू भन्दा अग्रजबाट टिका, जमरा लगाएर आशिर्वाद लिने गरिन्छ । जसका लागि आजसम्म काठमाडौं उपत्यकासहित देशभरका शहरी क्षेत्रबाट घर फर्किनेहरुको लर्को छ ।
आज बिहानसम्म करिब ८ लाख यात्रु काठमाडौं उपत्यकाबाट बाहिरिएको यातायात व्यवसायी महासंघले जनाएको छ ।
रोजगारीको सिलसिलामा शहर पसेकाहरु पनि दशैँको अवसरमा हर्षोल्लासपूर्वक मनाउन गाउँ फर्किरहेका छन् । काठमाडौंको नयाँ बसपार्क, कोटेश्वर, कलंकी लगायतका स्थानहरुमा यात्रुहरुको चाप धेरै देखिन्छ ।
टिका आउन अब दुई दिन बाँकी रहेकाले पनि मानिसहरु घर फर्किने क्रम बाक्लिँदै गएको छ । काठमाडौंका सडकहरुमा भने बिस्तारै सवारीसाधन पातलिँदै गएका छन् ।
बसपार्कमा घर जाने र टिकट काट्नेहरुको लाम भने बाक्लो छ ।
