दाङ । दाङको तुलसीपुरमा बाघको आक्रमणबाट ३ महिला घाइते भएका छन् ।
घाइते हुनेमा तुलसीपुर-९ बेलुवा निवासी ४५ वर्षीय कमला केसी, सोही ठाउँकी ५२ वर्षीय सीताकुमारी भण्डारी र १८ वर्षीय सरिता भण्डारी रहेको इलाका प्रहरी कार्यालय तुलसीपुरका सूचना अधिकारी तथा प्रहरी निरीक्षक प्रकाश थापाले जानकारी दिनुभयो ।
निरीक्षक भण्डारीका अनुसार तुलसीपुर-९ मा रहेको नव दुर्गा सामुदायिक वनमा च्याउ खोज्न गएको अवस्थामा आज सोमबार बिहान साढे ६ बजेको समयमा उनीहरूलाई बाघले आक्रमण गरेको हो । बाघको आक्रमणबाट घाइते भएका तीनै जनाको अहिले राप्ती प्रादेशिक अस्पताल तुलसीपुरमा उपचार भइरहेको प्रहरी निरीक्षक थापाले बताउनुभयो ।
बाघ भने जंगलतर्फ भागिसकेको प्रहरीले जनाएको छ ।
