सिन्धुली । मध्यपहाडी लोकमार्गअन्तर्गत सिन्धुलीको गोलन्जोर गाउँपालिका-१ को कुँडुलेमा गएराति पहिरो खस्दा ट्रक पुरिएको छ । बुधबार बिहान एक्कासि लेदोसहितको पहिरो खस्दा प्रदेश २-०३-००१ ख- ७१४४ नम्बरको ट्रक पुरिएको हो ।
ट्रकचालक पर्सा परवानीपुरका २५ वर्षीय रोशन पटेल सकुशल रहेका छन् । लगातारको वर्षापछि खसेको पहिरोका कारण दुईतर्फी यातायात अवरुद्ध भएको प्रहरीले जनाएको छ ।
यातायात अवरुद्धहुँदा पूर्वी पहाडी जिल्लाहरु ओखलढुङ्गा, खोटाङ, सोलुखुम्बु, भोजपुर, उदयपुरबाट काठमाडौं आवतजावत गर्ने सवारी साधन बिचबाटामै अलपत्र परेका छन् । यान्त्रिक कार्यालय मुलकोट र गोलन्जोर गाउँपालिकाको सहयोगमा जेसीबी मगाएर बुधबार बिहानदेखि नै पहिरो पन्छाउने काम भइरहेको प्रहरी प्रमुख एसपी गोविन्दराज काफ्लेले जानकारी दिनुभयो ।
